Israel gama chie-le-va-le-dan
 |
| israel train |
Israel hi gamneocha ahi, hijeh hin munkhat akuon munkhat jotna dingin phatchomcha bou alutjin ahi. Public Transport hi ahoilheh in, ideideinalai munjouse’a manlhomcha’a kilhungsoh keithei ahi. Israel Railway jong anomlheh in, India atoh tethei vang ahitapoi. Rail touman alhomin anom’e. Taxi a jong va-le-le thei ahinai, hinlah aman atamjep’e.
Company jatchom chom in, Domestic flight alensah un ahi. Adeh in Eilat apat, Ben Gurion Airport, Sde Dov Airport, Haifa kiti mun ho’ah aleng in, hinlah flight’a vale ding aman atame.
 |
| taxicab |
Israel gamsung’a hin Bus hi che-le-va-le na’in akihamanpen in ahi. Israel’a bus company lienpen EGGED hon, Israel gam munjouse’ah Bus alhaisah unvin, khopi lienpen apat kho neocha geiyin alhaisah uvin ahi. Bus company adang gahsei thei chu ahileh, Dan bus company tehin Gush Dan Area (Tel aviv leh akimvel’a khoneo) ho kah in alhai un ahi. Beersheva leh Nazareth kah’a bus lhai hokhu Private company a ahi. Hinlah Israel gamsung’a Bus bhara hi atampoi, bus jouse hi Air-contidion nge ahin, aphat dunjui toh kitoh chet in alhai jing uvin ahi. India gam bang’a conductorpu tiho vang umlou ahi. Bus tolpan abona akopsuoh kei ahitai. Bus atamjo hi Shabbath leh Kut nikho ho hin alhaipoi. Friday nilhangkai apat akicholduo uvin, Shabbath kichai-chai leh alhaipan kit uvin ahi.
Taxicab hohi muntin’ah aumin, amaho hi bus lhaina lampi ah alhaisuoh kei un, hiche Taxicab ho’a hi mi 10 tobang kitouthei ahi. Bhara manjat hi ahileh Bus asang’a chengkhat vela tamjo alah jiu ahin, lamkah-twikah’a koima lapa talouva direct a lhailhung ji ahi. Bus timing laplou ho a ding’a kijen ahi, ahin, mi adimkah’a kipatdohlou ho ahikit jeh in aboihoi thim’e.
 |
| egged bus |
Chuleh Israel gam’a Transport system hi International level a kibol ahijeh in, Driver pa hi Veilam’ah atouvin ahi(India gama jietlama driver pa tou ahi). Traffic signal a jouse’a Hebrew, English leh Arabic in akijihsuoh keiye.
Bus a natouteng, return ticket puma nakilah thei ahi. Return ticket puma nalah a ahileh shekel 5 vel a lhom ding tina ahi. Hiche return ticket hi nithum sung’a nahunkile nading’a namathei ahi.
Israel leh Palestine gari kihetkhen na ding aumin ahi.
 |
| Israeli Police vehicle plate |
 |
| Israeli vehicle registration plate |
 |
| Palestine vehicle plate |
