Israeli Driving License

Driving License

  • Pemthah ho (Olim khadashim), Tourist leh phatchomkhat Israel’a chengding hon Israel gamsung’a gampam akuon driver’s license aneileh, kumkhat sung gari atolthei ahi. Hiche driver’s license hi aliyah nabolnia pat kum 3 sung’a valid ahinahlai leh namanthei ahi. Hiche kum 3 sung’a hi nangman India driving license chu Israeli driving license a nakikheldoh ngai ahi. Itih hamkhat’a kum 3 sung’a nakhel doh manlouva ahileh, Driving Theory Test leh Practical Test a nakipat kit ding ahi. Driving Lesson hi 28 aumin, Theory hi Indian driving license neisa hon abol u angaipoi, hinlah practical vang mijousen abolteitei ngai ahi.
  • Israel nahunglhung teng, driving license nahinkipoh ding chu alhompen’a lhathum masang’a Issue kibolsa hiding ahi. Na driving license a chu Date of Issue akijih ngai ahi. Israel gama Tourist hon gari (car) atolnom uva ahileh, aumsung’a ding’a akibolthei ahi. Pemthah nahi niapat kum thuma sung’a driving Test nabol noma ahileh, Written Test  jaolouva Practical Test bou nabolthei ahi, hinlah, aliyah nabol masang’ Israel gam ijatvei hamkhat nahungvil khah’a ahileh, Transport Office hon written test nabolsahtheina diu tha aneiyin ahi.
  • Pemthah hinajala namanchah thei “Oleh Benefits” noiya car nachoh noma ahileh, Israel driving license nanei angaiye. Koihileh kum 65 val hon Israel driving license anei uva ahileh, kum 2 sehleh renew akibol u ngai ahi, hinlah kum 65 noilam hon vang Israeli driving license hi kum 10 sehleh renew abolthei diu ahi.
  • Test nabol na a, nalosama ahileh, aniveichanna a jong manbeiya Test nabolkit thei. Hinlah nivei nalolhin louva ahileh, Theory jong nalah ngaiding, chuleh Practical Test jong phatsottah lutmaithei ahi. Israeli Driving license naneiya ahileh gamchuom chuoma jong namanthei ahi. US gama Israeli driving license hi kum khat valid ahi.
Israeli Driving License Lahdohdan
  • Indian Driving License naneiya, Israeli Driving License a nakhelnom/naneinoma ahileh, Practical Test naboltei tei ngai ahi. Hiche kheldohna ding’a alutjat chu 1300 shekel ahi. Pemthah hon Indian driving license (aliyah abolmasang’a lha 3 masang’a issue kibolsa hiding) anei ngai ahi.
  • Amasapen a Mitbeh-siem (Optician) hokoma nache ngaiding ahi. Hiche Mitbeh siem hohi Ministry of Vehicle Licensing te hetpiehna noiya umho hiding angaiye. Mitbeh siemho koma nache teng nakichoi ding chu Teudat Zehut (Israeli ID) chuleh Mitbeh naneisa ahileh mitbeh nakichoi ngaiding ahi. Hiche muna hi Ministry of Vehicle Licensing te akuona Form khat napeh diu, nalim (photo) kap uvintin, na mit avetchil (check-up) diu ahi. Mit vetchilna ding’a hi 40 shekel ngai ding ahi.
  • Form napeh nauva chu na damtheina lampang toh kisaiya jihding umding ahi. Hiche sung’a hi gari natol teng nasuboithei dammona nanei/naneilou ho nasutlut ding ahi. Hiche Lekha chu Doctor koma nachoi ding Doctor pun soi akaiding, gari natol teng nasuboi thei damlouna naneiho lekha a asutlut ding ahi.
  • Hiche jouteng nachenna District sung’a Misrad Harishui (Ministry of Vehicle Licensing) tekoma nache ding, na Teudat Oleh, leh Indian driving license nakichoi ding amahon Seal atadiu ahi. Na veng a um Ministry of Vehicle Licensing  Branch hon hiche hi akhelthei pouve, hinlah District Level a um Ministry of Vehicle Licensing  honbou na Indian driver’s license chu Israeli driver’s license a akheldoh thei’u ahi.
  • Hiche jouteng leh Driving Test bolnading’a Driving Instructor nakilhen ding ahi. Driving Lesson hi khatvei ham nivei ham nalahding chujou teng Practical Driving Test nabolpai thei ahi. Driving Lesson naneina te chun Agrat Mivkhan Form nahinpeuvin tin, hiche a chu Driving Test fee napeh nading lekha ahi, hiche chu Post Office a nachoiya, a fee chu nagapeh ding ahi. Alhangpi a Driving lesson hi nikhat leh pungkah khat ahin, gari gear umho ahileh Shekel 110, Automatic gear ho najil leh 130 shekel ahi. Driving Lesson nalah dingkuon leh Gear umho ham Automatic gear hoham tihi hoitah a nakilhen ngai ahi. Hiche dungjuiya chu License namuding ahi. Ajeh chu Automatic gear najil’a ahileh, nathep pai ding, hinlah hiche License a chu Gear umho natolthei louhel ding ahi. Gear umho najil leh, hahsathim in tin, hinlah License namu teng Automatic jong natolthei ding ahi.
  • Hiche jouteng Agrat Mivkhan (fee pehna ding lekha) chu nakichoiya Post office’a nache ding ahi. Hiche hi 65 shekel hinte. Receipt kilah ding haimil hih in.
  • Hiche jouteng Test nalah thei ahitai. Na Teudat Zehut kichoiyin lang chuleh a receipt chu na Driving Instructor pu pen. Test nabol jouleh, na Instructor pun phone nahin bolin ten, Test nalolhin/nalosam nahinhetsah tante. Hiche hi ni 2-3 kah’a nahinhetsah ding ahi.
  • Test nabol sung’a chu Instructor pu chu shekel 400 vel napieh ngai ding ahi, ajeh Test bolna’a ama car namanjeh’a napieh ngaiding ahi.
  • Test nalolhin teng na Teudat zehut kichoiyin lang Misrad Harishui tekoma nacheding ahi. Amahon Temporary Driving License leh Test nabolna ding’a sumnapiehna receipt nahinpeh diu ahi.
  • Post office’ah chekit in lang, na Temporary Driving License namanpan theina ding in fee themkhat gapekit in. Permanent License chu na chenna address hapta giet (8 weeks) sung’a nahinthot diu ahi. Kum 65 nalhin kahsea, hiche Permanent driving license hi kum 10 seh leh khatvei Renew naboljing ding ahi. Kum 65 nalhinjou teng, kum 2 seh’a Renew nabol ngai ding ahi.

Wheewwww!!….ngapchat vang aumbeh hih’e. Manipur’a siemthu minute khat kah’a lahdoh tovang akikhelheh’e..