HOUSING
Israel hi gam neocha ahi. Mi atamjo twipang’ah leh Jerushalem ah acheng nomun ahi. Niseh in mi apunbe in hinlah chenna ding inn alhomlheh in ahi. Hiche jeh hin, Israelis atamjo hi thinglhang gam’ah achen un ahi. building asandan hi dan 3-10 chan ahi. Inchoh ding kiti hi thilbai ahipoi, aman atame, inbhara luo vang anomjepnai. Gamsung’a chenna ding mun chuomcheh’a aumbangin, amanjong achuomcheh ahi.
Israel’a apartment nachoh/ahiluleh bhara’a naluo teng, electronic manchah thei, tv, fridges, washing machine etc hohi umlou ding, hiche hohi nakichoh thei ahi. Bedroom hohi aneotheiyin, common room hovang alennai. A room sung’a hin thilkoina almira ahilouleh bang’a beh almirah hojong aumpoi. Abangkhat levang inn neaten almirah ahilou thildang dang tichu, sofa seat, gas-stove, fridges table, bed, kiti hohi adalha jiuvin, hitobang ho naluo/nachoh khah leh avangpha nahimaiye.
Insung’a bathroom, toilet um ahi. Inn abangkhat hon latrine 2 aneiyun ahi. Thilkoi na hi inn jousen achuombeh in aneicheh un, hiche thilkoina (Storage) hi inn noilang’ah aumnomdehset ‘e.
Car koima vang aumpoi, lampi komlah’a nangah ngai ding ahi.
Villa kiti hi atumbeh’a eima bou channa inn, compound leh honboltheina leh car ngahmun umna inn ho ahi. Villa hovang aman atamtotoh in anomtheiyin ahi.
INN BHARA
Inbhara luo hi amanbaiyin ahi. Vetsahnan inn khat chu room thum tobang ahileh alhangpin in shekel 1,600-2400 ahi, hiche jong hi amun dunjuiyin atam/alhom kit in ahi. Hiche inbhara hin imacha ahoppoi, tichu electric bill, twi fee, gas fee leh telephone hohi achuombeh’a kipekit ding ahi.
Inn naluo kigot teng nahet ding’a poimo hochu :
- Real-Estate Agent (Inn-le-lou lampangtoh kisaiya Agent ho), amaho hin inn bhara naholpeh diu, nadei penpen nakilhen’a, amaho chu inbhara lhakhat man napieh ding ahi.
- Rent Agreement (Contract) sign nabol teng, Inn neipa lawyer pat chu inbhara lhakehkhat man napieh ding ahi.
- Twi fee leh light-fee hi contract sign nabolnia kipat nangmang napieh ding ahitai. Hiche hi zero a kipan ding ahi. Namandohjat jat napieh ding ahi. Alhangpia kahetdan in twi fee hi lha 2-3 jouleh shekel 200 lahding vel ahijing, hitobangma chun light-fee jong ahiji’e.
- Gas fee hi, na inn luo nadunjuiya nakituo ding ahi. Bottle a um ho ahileh, bottle 2 hi nakichoh ngaiding ahi. Achulouva, na innluo nate chun Line’a akilah uva ahileh hiche chu namanden ding ahi. (Gas hi amunpi akuona Pipe a kila ji ahi)
- Tuolman (Property tax) hi kumseh leh napieh ding ahi.
Inn bhara contract sign naboljouteng, thil jouse nangma minna umding ahitai. Hinlah, gas, electric, water bill hohi, inn naluo masang’a ana umteng aman apehthieng lou uleh company ten alhalou diu ahi. Hinlah hiche hojeh’a boina hi aumlou tiding ahi, ajeh chu lawyer ho kikumna ahijeh in amahon abonna aboipi jiu ahitai. Hinlah Contract sign nabol masang’a hiche bill hohi Zero a aummasat nading’a nasei ding ahi. Inn naluo teng inntoh kisaiya boina jouse chu nangma boina ahitai. Innnei pa kikumna ding imacha aumpoi, amaho chu inn bhara napeh phot a ahileh, na umsung’a nakimohmutuo loumaithei ahinalaiye.
India lang bang’a inneite jingkah nilhah’a ahung kiphaosah nadiu imacha aumtapoi.
Innchoh
Inn nachoh kiguot teng, Real-estate lawyer hoitah nakihol angaiye. Sum kipeh tohna hi step 5 aumin, inneite toh inchopa kikah’a kihetthiemtohlouna aumlouna dingin signature hileh, lekha poimo lang hihen, sum kipeh tuona ho’a boina aumlouna ding’a, khatvei chaiya kichai thei lou ahi. Inn chohna sung’a hi lawyer leh government akuona Land-officer ho kikum ngai ahi.
Achomlamtah in kiseijeng taleh : Inn nachoh masang’a sum nanei ngai ahi. Sum naneilouva ahileh Mortgage Loan (Inchoh na ding mong mong’a Loan kila khu Mortgage Loan akiti). Hiche loan nalah theina ding’a nangman jong na bank account’a sum ijat hamkhat nanei angaiye. Tekah nan, inn nachoh kigot chu 400,000 shekel tobang ahileh, nangman na bank account’a 70,000-85,000 shekel nanei masat angaiye. Hiteng chuleh Loan nalah panthei ding ahitai. Hiche’a ding’a hi amasapen a document poimo : Teudat zehut (Israeli ID), Teudat oleh (Immigration certificate), Teudat Zakkaut (Certificate of immigrant loan assistance eligibility), lhathum nanatohna salary lekha, bank account report lhathum’a, guarantor a pang ding hi mithum ngaiding ahi, amahohi nachate jong hithei ahi, amaho akuona anatohnau salary slip lha 3. Hiche lekha kisei jouse hi original hilouhel ding ahi. Xerox copy hisuoh keiding ahi. Hiche lekha hotoh Bank akuona Inn chohna ding Form nakilahdohsa tochun bank te napeh ding ahi. Amaho hin ahinvetchil jouteng uleh phatsahna lekha “Ishur Ikroni” namuding ahilouleh phone a nahinkou diu ahi.
Bank akuona Ishur ikroni namu chu ipi ham itileh, bank loan nalahthei, asumjat leh interest kijihna lekha ahi. Hiche chu nangma nanop’a interest jat chu pejounang’a natileh bank’a nache ding amaho nagakimu pi ding ahi.
Hetding khat chu, Israel’a bank jouse komah Loan nadelthei ahi, tichu, form nalah suohkei ding, document toh na submit ding, amaho akuona Ishur Ikroni namusuoh keiding, bank chomcheh ahijeh’a sum napehdiu jat jong kibang lou ding, interest jong kibang lou ding ahi, hiche lah’a chu nangman ahoipen leh nadepen nakilhen’a amaho bank a chu nache ding ahi.
Hetding khat chu hiche hohi nikhat’a kichai lou ahi, lhakhat beh nasuhlut ding ahi.
In thilchoh
- Israel a inn naneiya thil nachoh teng hetding thil poimo aumin ahi.
- Thilman nielding jahcha hih in. Aman lhomjep a nachohna dingin seiyin. Israel’a apemthah nahi seiyin, khutileh discount themkhatbeh namuthei ding ahi.
- Israel gama thil nachoh’a, nadeilouva ahileh sum kinungle te umlou ahi. Amahon card khat napeuvintin, hiche card’a chu thildang nakichoh thei ahi.Nathilchoh nadeilou ham ahilouleh thil nachoh nom chungchang nadoh nom’a ahileh phone bol in lang amanjat dihtah hedoh kigon.
- Pemthah nahi hetsah in. Israel a pemthah hohi Israeli hon angaisang un pachatna nasatah aneijiuvin ahi: hijeh’a chu thilman jong lhomjep a namu thei ahi.Inn nachoh ham ahilouleh inn thah naluo teng, nachohna pa komah/ inneipa komah electric meter, twi leh Gass kilahlutna ho hoitah in kihilsah in. In naluo nikho a electric leh Gass meter ho sundoh in.
- Phone ham ahilouleh internet ham nakito guot teng, service provider kitup holmasan. Aman hoipen pen toh kihouvin lang, company phatah hedoh kigon. Hiche laiya hi nahetthei ahi. http://israeleasy.blogspot.com/Service hoilou nalah khah ‘a boina nanei leh company phone boljeng inlang nathilchoh aboinaho hetsah in, athil nakhelpeh diu ahi.
- Ana cheng masa ho donghat in. Na inko anache masa ho thil umdan kihilsah in. Inn nachoh nom teng, Lawyer jaolouvin imacha bolhih in.Building a nachenlut teng, building a mopona neipa (Baal habayit) kimupin. Building a chengkhom jousen lhaseh leh kalbi suhtheng man, electric bill kiti ho hi atuokhom jiu ahi.
