UNEMPLOYMENT BENEFITS

Na natohna akuona manager pan nahin nodoh teng Kumkhat nalhin a ahileh Pitzui Piturim sum namu ding ahi. Hinlah kum ijat tongjong le chun, nangma machama company nadalhah leh Pitzui Piturim munading ahahsai, company ten nalungset levang napenauvinte. Hinlah, kisuhkhahna jeh ham ahilouleh hitobang'a hinkho'a natong theitalou ding'a dammona naneijeh a nanatoh nahai le, Pitzui sum namuthei ding ahi. Company ten nanodoh uva ahile vang Pitzui sum namutei tei ding ahi.

Dan dungjuiya chun Company ten nanodoh nomtah uva ahileh nahetsah masat ungai ahi. Nanatohna chu lhagup nalhin tah'a ahileh, company ten nikhat masang'a nahetsah masat diu ahi, kumkhat natoh tah a ahileh, company ten nithum masang'a nahetsah diu ahi. Kum 2 natohtah'a ahileh ni 14 masang'a nahetsah masat diu, kum 3 nalhin teng leh lha 2 masang'a napotdohna ding thu nahetsah masat u ngai ahi.

Company ten jingleh nahungkuon lou diu ahitihi nahetsah masat u ngai ahi. Ahin hiche nia dinga sum napeh diu ngai ahi. Hinlah company atamjon hiche policy hi aneipouve.

Na natohna akuona nahung kinodoh teng ipi nabol thei ham ?
Sum namutheina dinga anoiya kisei hohi najui angaiye :

  • Nachenna kho sung'a Employment office (Sherut Ha Taasuka) komah register nabol ding ahi.
  • Bituach Leumi (Nation Insurance) tekoma na natohloudan ho naseiya soi nakai angaiye.

Hetding khat chu Pemthah (oleh khadash)  hiya, aliyah abola pat kumkhat lhingloulai ahileh, aboldang jatchombeh aumkit in ahi. Lhagup alhijouva innsungmi koima natong aumlouva ahileh Unemployment Benefits amuthei diu ahi. Hiche na ding'a hi Misrad Klita te koma gache ngai ahi.

Liskat HaTaasuka (Employment Office) : Bituach leumi tekoma nanatoh lou naseimasang'a Liskat HaTaasuka tekoma register nakibolmasat angaiye. Hiche a ding'a hi Teudat Zehut (Israel-ID) nakichoiya, nakatong tapon, hinlah natohna adang munhoi auma ahileh neiholpeh uvin, tia lekha khat a soi nakai ding ahi.
Liskat Taasuka te bolthupipen chu ahileh, mia ding'a natoh holpeh hi ahi. Amaho hi group ni aumin, Lekha simsang hoding'a natoh holpeh ho chuleh Lekha simsanglou ho a ding'a natoh holpeh ho ahiuve. Amaho koma nache teng, Degreee nei nahileh, hiche lekha hochu kichoiyin. Amahon nathepna leh nahetna dungjuiya natoh nakilom naholpeh diu ahi. Nahetna leh nathepna toh kibang'a natoh namupeh uva, nangman natohnomlouva ahileh, Umemployment Benefit sum namutahlou ding ahi. Natohna neiloujousen amaho office hi agavil jingdiu ahi. Kum 50 apat noilam sen hapta khat'a nikhat agaphah jing diu, kum 50 apat chunglam hon lhakhat leh khatvei agaphah diu, hiche muna chu Soi akai jing diu ahi. 

Bituach Leumi : Liskat Taasuka a soi nakai teng, sum ijat namu ding ham tia vetlhahna neiho chu Bituach Leumi (National Insurance) te ahiuve. Amaho hin, mi athepna leh ahetna chuleh sum ijat anasanji em ti dunjuiya, natonglou ho sumsan ding akholjiuva, chuleh amahohin bank account'a sum ahinhetlut jiu ahi. Amahon abol thupipen chu ahileh, mikhat chu anatohna akuona ahung kinodohtah'a ahileh, natohna ding dang amukah'a akimanchah na ding sum themkhat apeh diu tini ahi. Mikhat chun anatohna akuona kinodoh hilou, hinlah aman natohna amachama adalhah ahileh, Bituach leumi ten, anatoh dalhah nia kipa ni somko (90 days) sung sum apieh thei u ahi. Hiche sung'a chu Liskat HaTaasuka ten natohna amupeh lou uva ahileh, Bituach ten sun apehjing diu ahi. Bituach leumi akuon hitobang sum mutheina ding'a, nangman company a alhoma pena kumkhat beh natoh ngai ahi, kumkhat alhinloutah'a ahijouleh, Israel kumkhat leh akeh na umsung'a ni 300 (300 days) beh na natoh'a sum nalo ngai ahi.

Unemployment benefits namutheina ding'a lekha ngaicha ho chu ahileh :
  • Bituach leumi tekoma na katong tapoi tia lekha, amahon nahinpeh u.
  • Nanatoh na (manager) akuon lekha, ibola natoh nangah ham, itih a natoh pana itih a nangah ham tia kijih na lekha
  • Na natohna jouse'a Monthly Salary Slip lha 12 sung'a napieh ding ahi.
Nalekha ho vetchilna aneijou teng uleh, Bituach Leumi te akuon lhaseh leh sum namu ding ahi. Namujat ding chu ahileh mikhat in alhangpiah lhaseh'a alodoh jou, tupet a 4500 shekel namu ding ahi. Atampena 7,600 shekel hi mikhat in amuthei ahi. Hiche sum hi Register nabolnia pat kisimpan ding ahi, hijeh'a chu natoh nahai jouva pat agannatheipena register nabol ding angaiye.

Hiche sum hi itihchan namuthei ham itileh, cha ijat naneiya, insungmi ijat nahiuva, mi ijat in na atoh em ti ahinvet kit diu ahi. Atampena vang ni 175 (shabbath le kut ho simlou) sung namuthei ahi, hinlah hiche hi alhangpia kum 45 chunglam ho ahijiuve. Alhangpia kum 35 leh 45 kikah hon hiche sum hi ni 138 sung amuthei u ahi. Chuleh kum 35 apat anoilang honvang hiche sum hi natonglou hela ni 100 kah sung'a amuthei u ahi. Hinlah, anikho hi cha ijat nanei em ti dungjuiya kitamsah thei kit ahi

Kum 4 sung kikah'a hi Unemployment benefits sum hi 2 vei nakihonthei ahi. Iti hamkhat a nasum muding nikho kitteppeh sung'a natoh nakimu'a, nahung kinodoh kit a ahileh, amasa'a nasummu ding nikho kiteppeh avalnalai hojeh'a chu sum namuthei kit ahi.